Buxheli: Trafik me eshtrat e partizanëve

ALARMI/ Në datën 13 shkurt u vodhën 21 skeletet e dëshmorëve të Lushnjes për t’u shitur nga trafikantët

Në muzeun e Lushnjes ka ndodhur diçka tinzare dhe agresive, gjatë mesnatës së 11 shkurtit, disa ditë para se të zbardhej mesazhi paqësor  i Shën Valentinit. Njerëz të panjohur kanë hyrë në sallën muzeale pranë varrezës së dëshmorëve dhe kanë grabitur 21 skelete partizanësh të vrarë gjatë vitit 1941-1944. Këto skelete mbaheshin aty që nga viti 2003, pasi ishin zhvarrosur nga varrezat publike për t’ju bashkuar dëshmorëve të tjerë të qytetit, duke pritur ditën e rivarrimit në mënyrë ceremoniale në shtratin e topit dhe të drejtuar ga ushtarakë me uniformë. Por në vend të ushtarakëve e uniformë një natë kanë hyrë aty njerëz me maska dhe kanë grabitur skeletet, duke lënë pas misterin. Menjëherë janë vënë në lëvizje familjet e dëshmorëve të cilët kanë kërkuar të mësojnë fatin e vendndodhjes së skeleteve, por në vend të përgjigjes ata kanë marrë ngritjen e supeve nga anas e kreut të Bashkisë. Me këtë rast, kryetari i shoqatës së Dëshmorëve, Dalan Buxheli ka bërë denoncimin në organet përkatëse duke i hartuar një letër edhe krerëve më të lartë të politikës dhe shtetit shqiptar. Sipas Buxhelit, ekziston mundësia e trafikimit të eshtrave të dëshmorëve, duke u dërguar në varrezat e ushtarëve grekë, ose për t’i shitur ato si eshtra të ish-të burgosurve. E gjithë kjo histori e turpshme trafikantësh, sipas Buxhelit duhet ndaluar. Sepse nëse ndodh që ato të varrosen në varrezat greke, atëherë pengu i familjarëve do të jetë akoma më i madh, kundrejt një padrejtësie të tillë njerëzore dhe historike. Dhe nëse eksistojnë me të vërtetë fantazmat, kjo mund të konkretizohet atëherë kur në varret e vrasësve të futen skeletetet e të vrarëve. Sipas Buxhelit gjatë kësaj periudhe ka lulëzuar trafiku i skeleteve, duke u konkretizuar edhe me skeletet e Kosinës. Prandaj, ai kërkon rikthimin e eshtrave të partizanëve në varrezat dëshmorëve e qytetit të Lushnjes. “Ata po i rivrasin përsëri dhe askush nuk i mbron dot nga babëzia e trafikimit të kohës së re”, u shpreh Buxheli.