Reagon Ambasada Britanike

Ambasadorja Mcllwham : “Në BE me sistem gjyqësor të përgjegjshëm”

Ambasadorja Mbretërisë së Bashkuar në Shqipëri Fiona Mcllëham përsëriti dje në Tiranë kërkesën e Bashkimit Evropian për një sistem gjyqësor të përgjegjshëm e transparent. Deklarata u bë gjatë ceremonisë përmbyllëse të programit të financuar nga Mbretëria e Bashkuar për modernizimin e policisë shkencore shqiptare. Falë këtij programi në Institutin e Policisë Shkencore janë implementuar metoda dhe janë instaluar sisteme dhe pajisje moderne për ekzaminimet e ndryshmeve kriminalistike, përfshirë edhe instalimin në vitin e kaluar të pajisjeve për ekzaminimet me anë të ADN-së. Duke e cilësuar sistemin e ekzaminimit të ADN-së një mjet të fuqishëm në arsenalin e Policisë Shkencore, Ambasadorja Mcllwham u shpreh se modernizimi i këtij sektori të Policisë së Shtetit kontribuon në reformat më të gjera dhe progresin drejt një sistemi gjyqësor të përgjegjshëm dhe transparent që e kërkon BE dhe që e meriton populli shqiptar. Programi "Për modernizimin e Policisë Shkencore", ka filluar në vitin 1998 dhe është përmbyllur në Dhjetor 2009, ndërkohë që investimet për realizimin e këtij programi llogariten në rreth 4 milion euro.