Gazeta Telegraf: Rektori i Universitetit Bujqësor, Fatos Harizaj

Rektori i Universitetit Bujqësor, Fatos Harizaj
================================================================================
Gazeta Telegraf on 27/01/2012 17:22:00

Njeriu i salloneve të politikës, zapton auditorët e arsimit

Rektorin e Universitetit Bujqësor të Tiranës, Fatos Harizaj, është tepër e
vështirë ta kontaktosh dhe të komunikosh për problemet aktuale të arsimit
të lartë shqiptar dhe sidomos të universitetit që i është besuar të
drejtojë. Aq e vërtetë është kjo sa në mjediset e fakulteteve të këtij
universiteti ka dalë fjala se më lehtë mund të takosh Papën e Romës se sa
Fatos Harizajn. Dje gazetarja e “Telegraf” është lënë me orë të tëra
pas dyerve të zyrës së tij, me pretekstin, sipas sekretares së tij, se,
“rektori është tepër i zënë me probleme më të rëndësishme dhe nuk ka
kohë të takohet me gazetarët”. Kjo ndodh në një kohë që ka nisur
fushata për zgjedhjet e reja në universitete. Po si po shkojnë këto zgjedhje
në një nga institucionet më të rëndësishme të vendit, sikurse është në
të vërtetë Universiteti Bujqësor, këtë e di vetëm zoti Harizaj. Heshtja e
tij e mistershme lë shumë vend për dyshime. Janë lojërat politike që ai i
ka shumë për zemër t’i bëjë për të mbajtur me thonj e me dhëmbë një
karrige apo janë manovrat që po bëhen në këtë periudhë zgjedhjesh? Edhe
këto i di vetëm zoti Harizaj. Por ne kemi të drejtë të pyesim: Ç’është
ky drejtues universiteti që nuk ka kurajon të përballet me shtypin dhe të
japë një intervistë? Çfarë misteresh fsheh ai me hermetizmin që shfaq dhe
me kokëfortësinë që tregon për të mos komunikuar me mediat? Ky vëzhgim
është vetëm sa për fillim. Gazeta “Telegraf” do të ndjekë procesin e
zgjedhjeve, por edhe probleme të tjera në këtë universitet, të cilat do
t’i bëjë publike në numrat e ardhshëm.