Speciale

Arroganca e ministres dhe sovrani

Integrimi i vendit dhe 12 kushtet e BE-së ishin objekti i diskutimit në komisionin parlamentar të integrimit,  ku mori pjesë edhe ministrja Majlinda Bregu. Vonesat në zbatimin e detyrave të shtëpisë që Brukseli i ka vënë vendit tone,mungesa e gjatë e opozitës në parlament dhe ndihma që ajo duhej të jepte në përshpejtimin e këtij procesi ju shtua dje edhe arroganca e Majlindës, mësueses dhe spikeres të cilën publiku shqiptar e duartrokiste gjithmonë kur ajo mbaronte edicionet e lajmeve. Por Majlinda, e cila ka për detyrë të ndërgjegjësojë  në radhë të parë publikun  shqiptar  si dhe të bindë deputetët  e opozitës për rëndësinë, por edhe për gjithçka është bërë në lidhje me projekt-raportin duhet të tregojë respekt dhe detyrim ndaj të zgjedhurve të sovranit. Sigurisht, nuk do analizojmë rëndësinë që ka për kombin shqiptar plotësimi i këtyre pikave, sepse ato dihen, as edhe detyrimin  ligjor, por edhe moral të opozitës për  realizimin e këtyre detyrimeve . Qëllimi i këtij vëzhgimi është sjellja  e ulët që nuk përkon me një njeri, i cili kërkon të jetë flamurtar i integrimit siç është Majlinda. Ne pamë dhe dëgjuam një mungesë kulture, edukate dhe mbi të gjitha detyrimi ligjor që cilido ministër dhe funksionar i lartë i shtetit ka përpara sovranit dhe njerëzve, të cilët e përfaqësojnë ata. Majlinda u çua dhe shpërfilli deputetët duke thënë -sikurse e pohoi edhe zonja Doda se kishte një takim të rëndësishëm me të huajt. Po çfarë janë të huajt përpara deputetëve dhe përfaqësuesve të popullit nga i cili Ju Majlinda ngjitët shkallët dhe me paratë e taksapaguesve shqiptarë shëtisni dhe udhëtoni pambarim në çdo cep të botës, hani e pini dhe paratë i paguajnë shqiptarët dhe jo të huajt, të cilët ju preferoni. Ku e gjeni guximin të përdhosni deputetët  e Parlamentit shqiptar ? Arroganca që ju treguat duke shpërfillur  përfaqësuesit e popullit është e turpshme. Sigurisht, që nuk dua t’i dalë në mbrojtje deputetit  si individ se ndoshta ai ka më shumë se sa ju gjynahe, por  vlerësoj institucionin që ai përfaqëson dhe e ka sjellë në atë karrige. Le ta bëjë veprimin tuaj dhe të largohet në mënyrë demonstrative një ministre në Francë, Itali apo Gjermani dhe do ta shohësh se nuk do ta mbajnë 24 orë në postin e ministrit. Nëse Ju kishit një takim duhej me domosdo të rregullonit axhendën e takimeve, ku të gjitha janë pas atij të Parlamentit apo sovranit të shqiptarëve. Nuk e di pse, po m’u duk sikur sjellja juaj i  ngjante më tepër asaj të Nexhmijes në kohën e merhumit, e cila sillej si vasale ndaj njerëzve të thjeshtë, por që një ditë populli triumfoi. Ndaj ju duhet të reflektoni sa nuk është vonë dhe se integrimin duhet ta filloni  në radhë të parë nga vetvetja .