Draft-raporti i BE-se

Draft-raporti i Bashkimit Europian për vitin 2011: “Shqipëria s`plotësoi asnjë kriter”

Shqetësime për procesin pas zgjedhor

Shefja e njësisë për Shqipërinë në Drejtorinë e Zgjerimit në BE, Marta Garsia Fidalgo, ka deklaruar se Shqipëria vendi nuk ka plotësuar asnjë prej kritereve dhe prioriteteve të vendosur nga Bashkimi Europian. Media bën me dije se deklarata është bërë gjatë diskutimeve të delegacionit për Europën Juglindore të Parlamentit Europian. Sipas zyrtarëve, shqetësime janë shprehur edhe mbi procesin pas zgjedhor. Raporti i BE-së që do të publikohet në 12 tetor, pritet të konstatojë se situata pas procesit të numërimit të votave do të jetë kyçe. Ndërkohë që procesi zgjedhor në Shqipëri ende nuk ka përfunduar, Komisioni Europian hedh dritë mbi vlerësimin që do të përmbajë raporti i radhës i progresit për Shqipërinë. Përveç lëvdatave për mosabuzimin me regjimin e lirë të vizave, Komisioni, i cili nuk ka marrë ende planin e korrigjuar të aksionit për zbatimin e 12 kritereve kyçe nga Shqipëria, vlerëson se nuk është përmbushur “as një i vetëm” prej tyre. Raporti, i cili pritet të jetë një ndër më të rreptët në historikun e marrëdhënieve BE-Shqipëri, do t'i kushtojë një hapësirë mjaft të veçantë edhe procesit zgjedhor, e sidomos paqartësisë ligjore të vendimit të KQZ-së për numërimin e votave të hedhura në kutitë e gabuara. “Ka një shqetësim të qartë për mënyrën sesi vendimi është marrë në këtë moment të fazës së pas-numërimit. Por është gjithashtu e rëndësishme që tani procesi i ankesave të bëhet në qetësi, në respekt të rregullave institucionale dhe mendoj se çështja e saktësisë ligjore për këtë hap të ndërmarrë nevojitet qartazi që të zgjidhet, në mënyrë transparente, të ndershme dhe ligjore, duke respektuar rendin ligjor shqiptar. Pra, unë do të thoja jo vetëm fjalët e legjislacionit në letër, por edhe frymën e legjislacionit shqiptar”, ka deklaruar Marta Garcia Fidalgo, shefe e Njësisë për Shqipërinë në Drejtorinë e Zgjerimit të KE. “Duhet të jemi të qartë për mënyrën se si vendimi është marrë në këtë moment të fazës së pas numërimit. Është gjithashtu e rëndësishme që tanimë procesi i ankesave të bëhet me qetësi, në respekt të rregullave institucionale. Çështja e saktësisë ligjore për këtë hap të ndërmarrë, nevojitet qartazi që të zgjidhet, në mënyrë transparente, të ndershme dhe në mënyrë ligjore, duke respektuar rendin ligjor shqiptar”, – sqaroi Fidalgo. Më pas ajo ka rreshtuar 12 kushtet e Komisionit Europian dhe në secilën prej tyre asnjë nuk është përmbushur nga vendi ynë. Sipas saj, “situata ashtu siç qëndron sot është më pak e ndritur se 2 vite më parë”. Zyrtarët e Parlamentit Europian do të takohen më 14-15 qershor me deputetët shqiptarë në Bruksel për të diskutuar mbi integrimin e Shqipërisë. I vetmi vlerësim që bën raporti është ai që flet për zbatimin korrekt të rregullave të lëvizjes në zonën shenjen.